برد الشِتا شعر/ سمير الأمير

( إلى طاهر البرمبالى)



الغيط بيطرح مشاعر

اللى زرع.. شاعر

واللى حصد ..جلاد

خبى الولاد ف احتمال الألم

يا ام الولاد

**

شاعر فى ليل السجن بيغنى

يسرى ف شعاع القمر

(يطلع لوش النشيد)*

يبدر غيطان الأمل

فوق السحاب مواعيد

وينادى شوق الحياه للعيد

نهار العيد

**



شاعر ف ليل السجن بيغنى

مع اننا لما اتقابلنا ف "زهرة البستان"*

ما كانش باين عليه الفرح!

تاهت ملامحى ف الميدان والوجوه الحجر

قلبى زهق من منظر السياح

لما خنقنى الضجر

سلمت بدرى

وقُمت مستعجل

**

برد الشتا مستقرد بقلبى الضعيف

ولو اترميت ع الرصيف

تدوسنى البياده

واموت شهيد زمن العبيد

**

باختصار

الورد نار والصبر سِلم للقمر

أوللأمّر

دفيت مشاعرى بالاحتمال

الحلم عصفور الخيال

وعُمر صدرى ما كان قفص!!
_____


·مقهى" زهرة البستان " بوسط القاهرة حيث يلتقى الأدباء