كل يوم حجات بتحصل
وحاجات كانت وحصلت
وحاجات ممكن بكرة تحصل
انا مش عارف الى حصلى من الحاجات الى بتحصل والا الى حصلت والا الى هاتحصل على العموم انا كنت فى يوم كدة مش فاكرة كان امتى قريب ولا بعيد انا كنت فى مكان ياه كبير وباين علية نضيف ووانا موجود بس فية حاجة غريبة اوى انا شايف الوزرا الى بشوفهم فى التلفزيون بس همة قاعدين على مكن خياطة يالهوى هما الوزرا اشتغلوا ترزية ولا اية على العموم قربت اشوفهم بيعملوا اية لقيت كلمة الدستورمكتوبة بالخط العريض ياه هما بيعملوا اية ووانا واقف كدة دخل شخص كدة انا عارفة بردة ياة دة ابن الريس .
اول ما داخل لقيت كل الوزرا الى قاعدين يفصلوا قاموا على حيلهم كلة تمام يا باشا حاليا الدستورعلى مقاصك واحنا هانطحك عالشعب بشوية كلام وهايصدقونا
انا حاليا فهمت كل حاجة دول بقى الى بيسموهم ترزية القانون الى بسمع عنهم وهنا الطبخة بتم واحنا غلابة مش عارفين حاجة .وانا هاسكت كدة وانا شايف البلد قدامى بضيع علشان سياتة لا روحت نازل على التفصيل الى بيفصلوة وحاولت اقطعة بس اية دة مش بتقطع ولا اصلا حد حاسس بية خالص هو انا ميت ولا اية؟
قعت انبح فى صوتى حرررررررررررررام عاليكم بس ولا حياة لمن تنادى
بعد كدة اية دة انا فى القصر الجمهورى يالهوى انا دخلت هنا ازاى؟
اية دة الريس بنفسة امامى وانا مفيش بينى وبينة مترين ياه نفسى اقولة كلام كتير اوى يارايس حرام عاليك البطالة زادت يارايس ارحمنا يارايس .الناس مش لاقية تاكل يارايس .الناس هاتموت من القهر يارايس حرام عاليك .ياريس حرام عاليك البلد مش بتاعتك علشان تديها لاأبنك .
انا بكلمة وهوة مش سامعينى ولا واخد بالة اصلا اية دة الى انا شايفة دة أبنة كمان هنا الريس بيكلم ابنة الان انا سامعهم وهما مش سامعينى
بص يا ابنى انا سايبلك البلد من بعدى وعندى ليك شوية نصايح سامع
اوعى تكون ديمقراطى لو كنت كدة الشعب هايركب فوق دماغك ومش هايخليكى ساعة فاهم
اوعى تسيب الدفة للاسلامين علشان لو سيبتهم هايخربوها فوق دماغك انت واهلك كلهم
اوعى ترفض طلب لستنا امريكا بيع الدنيا وخليها مكسبك والى تقول عاليه يتنفز فاهم
اسرائيل دى بنتنا الصغيرة بيع العرب واشتريها هاتكسب كتيرررررر
يالهوى دى وصاية الريس لأبنة قعت ازعق حرام يارايس تبيع بلدك ودينك وناسك حرام عاليك يارايس سيبنا نتنفس ولا هوة هنا دة مش سامعنى لية مش عارف
اية المكان دة يالهوى انا اية الى خلانى فى البيت الابيض اية دة بوش والريس بتاعنا وكمان ملك السعودية ياه ورئيس السلطة الفلسطنية وكمان ملك الاردن دى العملية وسعت اوى اية الى بيقولوا بوش دة
انتوا فاهمين انا سايبكم تعملوا فى شعوبكم الى بتعملوة دة عالفاضى لا دانا عارف كل مصايبكم بس ساكت وكل دة علشان خاطر اسرائيل والبترول
انا مش عاجابنى شغلكم اليومين دول اية الى ادى الفرصة لحزب الله انة ينجح ويهزم اسرئيل اية مش عارفين انة خطر عاليكم قبل ما يكون عالينا انتوا مش عارفين انة بتساعدة ايران ولا اية؟
لازم تقوموا حرب على الشيعة فى كل مكان تكفروهم عاوز الناس تكرهم اكتر من اليهود نفسهم انتوا فاهمين
ياه انا شايف الريس صغير اوى دة كمان رجلية بتخبط فى بعضها من الخوف هو واصحاب الجلالة والفخامة والسمو .طيب انا هاعمل اية شايف وطنى العربى كلة انسان واحد بيتحكم فية قعت ازعق بردة حرام عاليكوا يا عرب حررررررررررررررررم
اية المكان دة كمان اية دة انا فى الشارع ياه اية كل الناس دى دة شعب مصر كلة الشعب كلة رايح على القصر الجمهورى وبيزعق ياه اخيرا الناس صحيت من نومها التقيل اوى انا سامع كل الناس بتقول
بالروح بالدم نفديك ياريس
يادى المصيبة بسأل واحد جمبى مش عاوز يرد مش سامعينى انتوا لسة نايمين وراحين تفدوا الريس بالروح والدم طيب اية دة كمان دى صورة مين دى دة ابن الريس يعنى كمان بقى ابن الريس رئيس واية كمان مكتوب لولاية خامسة ياه اديلوا حاكمك خمسة وعشرين سنة الشعب مش ناوى يصحى ابدا
ساعتها قولت اهرب بنفسى من البلد دى قعت اجرى لقيت نفسى فى غرفة متر فى متروفى ناس بتضربنى وبتقولى عاوز تقلب نظام الحكم وانا بردة بزعق ومحادش سامعنى
وفى وسط الضرب سمعت صوت مش غريب عاليا دة صوت امى بتقولى قوم يا زفت المغرب هاتدن انت هاتنام لبكرة قوم شوف شغل
وأخيرا انا فى بيتنا العزيز وطلع كل دة حلم ياه اية الاحلام المزعجة دى
والله مش عارف حال البلد هايستمر زى الحلم ولا لأ دة مستقبل على العموم الله اعلم
حمادة مصطفى
