شمس الوطن شعر/سمير الأمير
مهداة إلى الإنسان الفلسطينى
اطلق حصانك
اطلق حصانك ف المدى المجهول
جرب شطارتك فى العطش
الصحرا وسعت بما يكفى لحد الموت
وانت اللى فاضل من خضار الغِنا وسط السكوت
فاحسب سنينك فى ثوانى المطر
فات اللى فات من دهشة امبارح
وادى اللى جاى سانن سنان المصير
قصر العدو من عضم أجدادك
من جوع ولادك يتخنوا ولاده
فاصحى للون الزمن يابن انكسار الروح
والضم فؤادك فى الهوا السارح
ولو انت فالح تفوت
من نن عين الخرافة/نن عين الموت
ومن المدى المجهول للمدى الواضح
وبحد سيفك تشيل شال الفقير راية
دور فى أصل الحكاية
فك القصور ما تهدش
فك القصور تصبح بيوت
عدد الغلابة كتير..فرّق وما تعدش
واطلق حصانك فى مدى حبك
جرب شطارتك ف انتشار روحك
وفى انتصار الحياة واكبر على جروحك
المسألة إنت
الصحرا دى مش قدر
والليل ده مش مكتوب
غنى أغانى الشجر
واسأل عيون القمر
شمس الوطن إمتى؟
أنا بسألك إنت.. أنا بسألك إنت.
