الوصايا العشر
(إلي شاربي دماء الجنود المصريين في صحراء سيناء، إلى مخربي أولى القبلتين)
اظبط منظارك
خُد نَفَسك
وبكل هدوء
نشّن ع القلب الغافي
. . . . . .
اشرب
دمّ الأولاد الدافي
واغسل إيدك
في البير الصافي
اللي حفروه الأجداد
والزرع
اسقيه السمّ الشافي
قطّع رقابيه
والبيت انفيه
وان عجبك اقعد فيه
حافي !!
ماهو عَجِّز
وحيطانه تعبت
من صور الغايبين
والمواويل !
والنيل
انقله فوق أرضك بالمَيّه
دلتا وخطوط محنيّه
أو غيّر شكله لوحبّيت
والمعبد لما يعتّق
وقلوبنا تتعلق بيه
ادبحه شفّيه لمّا الهيكل !
الهرم الأكبر والتماثيل
صلّح ف نقوشهم بالأزميل !!
(حجاب القمح شبّاك القُلل
الحُكْشَه والتحطيب والطنبور
المشربيّه والمَلْقَفْ
رقص الخيول
خضخضة
مولودنا في الغربال ودقّ الهون
حكاوينا على الأرغول)
انسبها لنفسك بالفرض
وامحي خطاوينا
المرسومه على الأرض
من بدء التكوين
. . . . . .
واحنا عاذرينك
زي ما عذرنا جميع من جانا
م المحاسيب الدايبين
في هوانا لحد الموت
احجب عنّا قرص الشمس
بطاقيتك السودا اخفيه
وهلالنا اطفيه
بالنبوت
والنجمه بتاعتك
سنّ ساطورك حَمِّيه
ابري نيابها الزرقا
ارشقها في سمانا وعينينا
والوطن التايه جوّانا
اختار له الإسم وسمّيه
اضحك ويّا شيوخنا
واتبسّم في اللقطه
وتأكّد إن رجالنا ونسانا
وعيالنا الزايطه
ناسيين اللي عملته معانا
ما تخافش من الجتت المرصوصه
فوق الخارطه
شوالين قمح وشويّة دنانير ودقون
يخمدوا أجدع روح في الكون
ويخلوا آداننا
يتنّوا ف مالطه
أغسطس 1996
شعر: أسامة فرحات
