اعزائى
اسمحوا لى ان اعرفكم على ابنتى الحبيبة الدكتورة/ مها
كما اراها
مصر المحروسة الأبية
باعته تحية لكل الدول والشعوب العربية
واحدة من أغلى ولادها وأحفادها
تقول كلمتها وتنطق بصوتها
وتفضل هنا معاكم فى منتداكم
بسمة أمل وكلمة حرة وأبية
بس بلهجة مصرية
الكلمة المصرية اسمها مها الفدائية العبقرية
روح إيزيس فيها
وجمال نفرتيتى فى عنيها
وفى قلبها إيمان مارية
ماهى برضه موش انسية
دى روح ايزيس الحية
تلاقيها فى تاريخنا كله مستخبية
شفتها فى فلسطين فى تمانية واربعين
بطبطب على الفدائيين بحنية
وفى سبعة وستين
وقفت على القنال تساعد اللى راجعين مكسورين
وصمدت تحت الشمس والمطر
ومسكت ايد الرفاعى وهو دايس على الخطر
ماهى بنت مصرية
الجدعنة طبع جواها
وشجاعة
وساعة الجد فدائية
اصلها عندية
وهى كمان بهية
اللى الابنودى غنى ليها
علشان بهية الحرة تلبس القصب والف تمثال على الترعة يتنصب
لا ورقيقة وذكية
تكتب كلام جميل فى الحب والملاغية
اصلها رومانسية
والاكادة بتكتب كمان فى الوطنية والقومية العربية
وبتحلم بالكرامة والحرية
لا وكمان مثقفة
وعلى العز متربية
تقرا موليير ولامارتين وتناقش ابن سينا وارسطو وافلاطون ماهى غلباوية
علشان كده باناديها واقولها يا ستنا وتاج راسنا وشرفنا وعرضنا
ماهى مثال جميل وجليل للبنت المصرية
دى يا جماعة كلمة مصر وهدية من ايزيس
لكل الاحرار والاشراف فى الشعوب العربية الحرة الابية
واسمها مها المصرية
جمال النجار
مجرد واحد من بتوع العيش الحاف
والموت فى الحرب
والضرب بسن الكعب
مجرد واحد من الشعب
المشاركة الأصلية كتبت بواسطة طارق شفيق حقي