للقدس شوق النبى

[سمير الأمير]

للقدس شوق النبى شعر/ سمير الأمير





مطرح ما يطرح طرحها دمى

وشمسها شروقى

ورد انتفاض العشق فى عروقى

عمرى وتاريخ شوقى منذ انتصار حطين.





واقفين على حدود احتمال الحلم

للقدس شوق النبى.



يا ندهة الحجر الكريم لإدين الصبى

يا طلة الفجر الحكيم لليل الغبى

يا لحظة الإنتقام العظيم

ما تفرقيش بين العِِِدا*

اللى يخون الجلد لونه أجنبى

واللى يفاوض ع الوطن خاين/

جبان وخايف ولابد مش شايف تحت القدم.





تحت القدم دم الشهيد طالع

سد الشوارع ومد قدام العيون صوره

أطفال جسورة بتتجه للشمس

وتقيد نيران الحقايق فى ضلام الأمس.





مكتوب يكونلك يا حجر فى الفهم نايب

من بعد ما داسوك الأجانب طاير أبابيل

مكتوب تكون المستحيل

تخطف ملامحك من تاريخ الدم/

صوت الشهيد /المخيم/ توهان عيون الأم

لحظة غياب ابنها .. لحظة صعودك ياحجر للمنتهى.





سبحان من أسلم دراع الصبى قوة نبى مجاهد

رحيم وشادد

سبحان من أسلم قلوب العدو رعبها منى وانا مسجون!

مكتوب نكون

الشمس فوقنا واحنا فى غيطان الزتون

بنغنى للوطن اللى حاضن كل أولاده

نحكى حكايات الأحتلال للعيال

كان ياما كان فى غابر الأزمان

فات ع الوطن أتراك وشركس وانجليز ويهود

فات اللى فات

والوطن باقى على مر الزمان موجود.



* الِعدا: الأعداء